Eysturoy er - við síni vídd upp á 268 km2 - næststørsta oyggj í Føroyum. Her búgva uml. 11.000 fólk. Við sínum góðu bussambondum bæði í oynni og til hinar partarnar av landinum, kann við røttum sigast, at oyggin er ein miðdepil í Føroyum.

Oyggin bjóðar teim vitjandi eina ørgrynnu av upplivingum, sum røkka frá undurvøkrum landslagi, hugnaligum bygdum, søguligum støðum til framkomnar nýmótans bygdir og býir. Síðst á oynni er landslagið eftir føroyskum viðurskiftum reiðiliga slætt og lætt at ferðast í til gongu. Norðantil er Eysturoyggin brattari við høgum fjøllum. Eitt teirra er Slættaratindur, sum við sínum 882 m er hægsta fjall í Føroyum.

Gisting er møgulig í flest øllum bygdum í Eysturoy. Gistingartilboðini røkka frá hotellum til skótadeplar, tjalding og ból og bita. Tjaldingarpláss og pláss til búvognar er eisini og harafturat finnast matstøð og kaffistovur um alla oynna. Við flestu bygdirnar eru nýggj upplýsingarskeltir sett upp.

Við hesari heimasíðu bjóða kunningarstovurnar teim vitjandi at kunna seg nærri um alt, oyggin eigur at bjóða.